Stjórnendur HSBC eru að undirbúa uppsagnir 10 þúsund starfsmanna bankans en aðeins nokkrar vikur eru liðnar síðan forstjóri bankans lét af störfum og tilkynnti á sama tíma um uppsagnir fjögur þúsund starfsmanna vegna slæmra efnahagshorfa í heiminum.
Flestir þeirra sem munu missa vinnunna eru hálaunaðir starfsmenn bankans en um lið í niðurskurðaráætlun nýs forstjóra bankans, Noel Quinn, er að ræða. Samkvæmt frétt Financial Times eru það einkum vaxtalækkanir, Brexit og tollastríð sem hafa slæm áhrif á stöðu bankans.
Höfuðstöðvar HSBC eru í London og olli það talsverðum titringi á fjármálamarkaði þar þegar John Flint tilkynnti afsögn sína sem forstjóri bankans í síðasta mánuði eftir að hafa gegnt stöðunni í aðeins 18 mánuði. Engin skýring var gefin á ákvörðun Flint.
Þrátt fyrir uppsagnir vegna erfiðra aðstæðna í efnahagslífi heimsins hagnaðist bankinn um 8,5 milljarða Bandaríkjadala á fyrri hluta ársins. Það er 18,6% aukning á milli ára.
Í síðasta mánuði tilkynntu stjórnendur þýska bankans Commerzbank að störfum yrði fækkað um 4.300 sem er um 10% af starfsmönnum bankans. Jafnframt að um 200 útibúum yrði lokað. Deutsche Bank hefur tilkynnt um uppsagnir 18 þúsund starfsmanna og franski bankinn Societe Generale er að segja upp 1.600 starfsmönnum.