Base hótel á Ásbrú í Reykjanesbæ er hætt rekstri eftir því sem fram kemur á vefsíðu hótelsins. Þar eru viðskiptavinir beðnir afsökunar á þeim óþægindum sem þetta kann að valda.
Hótelið er í eigu félags á vegum Skúla Mogensen, stofnanda og fyrrverandi forstjóra WOW air.
Samkvæmt heimildum Fréttablaðsins var öllu starfsfólki hótelsins sagt upp í morgun.
Í tilkynningu á vef Base hótel eru viðskiptavinir beðnir um að hafa samband við bókunarþjónustuna sem þeir notuðust við eða við kreditkortafyrirtæki sitt. Þá er viðskiptavinum bent á önnur hótel í grenndinni.