Arion banki, Íslandsbanki, Kvika, Landsbankinn og sparisjóðirnir taka nú við umsóknum um stuðningslán.
Stuðningslán eru ætluð til að styðja við lítil og meðalstór fyrirtæki sem glíma við erfiðleika vegna samdráttar í rekstri vegna kórónuveirufaraldursins. Stuðningslánin geta numið allt að 10% af tekjum fyrirtækis á rekstarárinu 2019, að hámarki 40 milljónir króna.
Full ríkisábyrgð er veitt upp að 10 milljónum króna og 85% ríkisábyrgð umfram það, en markmiðið er að tryggja að stuðningslán verði veitt á lágmarksvöxtum.
Bjarni Benediktsson fjármála- og efnahagsráðherra fer fyrir verkefninu og fól Stafrænu Íslandi, að gera umsóknarferlið stafrænt á Ísland.is í samstarfi við viðskiptabankana. Þá höfðu seðlabankastjóri og fjármála- og efnahagsráðherra áður gengið frá samningi um umsýslu vegna ábyrgða ríkissjóðs á stuðningslánunum og Seðlabankinn í framhaldinu samið við lánastofnanir.