Íslenska sprotafyrirtækið OverTune þróar hugbúnað sem leyfir notendum hans að skapa tónlist, án þess að hafa tónlistarþekkingu eða þekkingu á tónsmíðaforritum. Með hugbúnaðinum geta svo notendur deilt tónlist sinni á samfélagsmiðla líkt og TikTok.
Fyrirtækið var að ljúka sínum fyrsta fjármögnunarfasa þar sem íslenskir og erlendir fjárfestar komu að og fjárfestu í fyrirtækinu. Áhugavert er að benda á það að englafjárfestirinn Charles Huang tók þátt í því að fjárfesta í fyrirtækinu en hann er einn af stofnendum tölvuleiksins Guitar Hero, sem er einn vinsælasti tónlistartölvuleikur allra tíma.
„Það að fjárfestar á þessum skala veðji á það að OverTune muni umbylta tónlist er ánægjulegt og gefur fyrirtækinu byr undir báða vængi til þess að vaxa hratt og örugglega. Að fá slíka fjármögnun inn í félagið á þessum tímapunkti eru góðar fréttir fyrir íslenska sprotaumhverfið,“ segir Sigurður Ásgeir Árnason, framkvæmdastjóri OverTune.
Fyrirtækið stefnir á annan fjármögnunarfasa og er markmiðið að safna tveimur milljónum bandaríkjadala eða um 246 milljónum króna.