Beint: Ný skýrsla SI til að efla samkeppnishæfni í grænni iðnbyltingu

Samtök iðnaðarins hafa gefið út nýja skýrslu þar sem lagðar eru fram 26 umbótatillögur sem öllum er ætlað að efla samkeppnishæfni í grænni iðnbyltingu og stuðla að framförum. Með stöðugu, hagkvæmu og skilvirku starfsumhverfi fyrirtækja eykst geta hagkerfisins til þess að skapa verðmæti sem styðja við og bæta lífskjör í landinu í grænni framtíð.

Þetta kemur fram í tilkynningu frá SI. 

Skýrslan verður kynnt í streymi fimmtudaginn 29. september kl. 9. Hægt er að fylgjast með útsendingunni hér fyrir neðan. 

Fram kemur, að íslensk stjórnvöld hafi sett metnaðarfull markmið í umhverfis- og loftslagsmálum og þau muni varða leiðina til framtíðar fyrir íslenskt atvinnulíf. Starfsumhverfi fyrirtækja muni ráða miklu um það hvort markmið stjórnvalda náist en það þurfi fjárfestingar og nýjar lausnir til að draga úr losun gróðurhúsalofttegunda. Með stöðugu, hagkvæmu og skilvirku starfsumhverfi sé líklegra að markmiðin náist.

„Umbæturnar sem ráðast þarf í til að ná fram stöðugu starfsumhverfi snúa að opinberum fjármálum, peningamálum og vinnumarkaðsmálum. Í skýrslunni kemur fram að mikilvægt sé að komandi kjarasamningar hafi það að markmiði að tryggja stöðugleika og varðveita þann árangur sem náðst hefur í að auka kaupmátt launa á síðustu árum. Til að ná fram hagkvæmu starfsumhverfi þarf að stilla álögum á fyrirtæki í hóf og beita efnahagslegum hvötum. Skilvirkt starfsumhverfi næst með því að einfalda regluverk og eftirlit,“ segir enn fremur.

Þá segir, að skýrslan byggi meðal annars á niðurstöðum úr nýrri könnun sem gerð var meðal stjórnenda íslenskra iðnfyrirtækja sem eru félagsmenn SI.

Dagskrá streymis er eftirfarandi:

  • Ávarp - Árni Sigurjónsson, formaður SI
  • Græn iðnbylting er hafin - Sigurður Hannesson, framkvæmdastjóri SI
  • Stöðugt og hagkvæmt starfsumhverfi - Ingólfur Bender, aðalhagfræðingur SI
  • Hagkvæmt og skilvirkt starfsumhverfi - Björg Ásta Þórðardóttir, sviðsstjóri mannvirkjasviðs SI

Hér er hægt að nálgast skýrsluna. 

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK