Landað í sumarblíðu á Seyðisfirði

„Við fórum út á miðvikudag og það tók okkur dálítinn tíma að finna þorskinn en þegar hann fannst á Gerpisflakinu gekk vel að veiða. Í reyndinni fengum við megnið af þorskinum á einum sólarhring, síðan fengum við um 18 tonn af karfa og lítilsháttar af ufsa og ýsu.“

Þetta segir Jónas P. Jónsson, skipstjóri á Gullveri NS, sem landaði rúmlega 100 tonnum af afla í sumarblíðunni á Seyðisfirði í gær. 

„Verðið hefur verið að þokast upp að undanförnu og það skiptir miklu máli en fyrr á árinu var það skelfilega lélegt eins og kunnugt er. Við munum halda til veiða á ný eftir hádegi í dag og gerum ráð fyrir að halda á sömu mið og síðast,“ er haft eftir Jónasi á vef Síldarvinnslunnar.

Auk Gullvers landaði Vestmannaey VE 75 tonnum á Seyðisfirði. Fékk fiskvinnslustöðin á Seyðisfirði afla beggja skipanna og segir Ómar Bogason rekstrarstjóri að nóg sé að gera. Minna sé fryst en oft áður og meira sent út ferskt.

„Frá okkur fara hnakkar til Frakklands og nú er farið að flytja út fersk flök til Þýskalands og það gengur vel,“ segir Ómar. „Þessi fiskur fer út með Norrænu, skipum Eimskips og Mykinesi frá Þorlákshöfn.“

• Blogga um frétt