Samningar náðst við Færeyinga

Fundur ráðherranna í desember skilaði ekki árangri.
Fundur ráðherranna í desember skilaði ekki árangri. mbl.is/Sigurður Bogi

Samningar hafa náðst við stjórnvöld Færeyja um fiskveiðiheimildir Færeyinga innan íslenskrar lögsögu og gagnkvæman aðgang að veiðum í lögsögu beggja fyrir norsk-íslenska síld og kolmunna á þessu ári. Samkomulagið náðist nú í hádeginu, samkvæmt upplýsingum mbl.is.

Fleiri íslensk skip fá að veiða í einu

Í því felst að þjóðirnar hafa gagnkvæman aðgang til veiða á kolmunna og norsk-íslenskri síld með sama hætti og á liðnu ári, með þeirri breytingu að hámarksfjöldi íslenskra skipa sem getur verið á kolmunnaveiðum í einu í færeyskri lögsögu fjölgar úr 12 í 15.

Þá var samið um að Færeyingar geti veitt loðnu við Ísland sem nemur 5% af ákvörðuðum heildarafla í loðnu á vertíðinni, en að hámarki 25.000 tonn i stað 30.000 tonna sem var áður.

Áfram munu gilda takmarkanir á heimildum Færeyinga til að verka loðnu um borð eða landa í Færeyjum til manneldis, samkvæmt upplýsingum mbl.is. Þó er fyrirkomulagið rýmkað á þann veg að viðmiðun takmörkunar til manneldisvinnslu verður 17. febrúar í stað 15. febrúar. Eftir 17. febrúar verða færeysk skip þannig að landa a.m.k. 2/3 af afla sínum í íslenskum höfnum.

Ísland afsalar sér Hjaltlandssíld

Samkvæmt upplýsingum sem mbl.is hefur fengið frá atvinnuvega- og nýsköpunarráðuneytinu verða heimildir Færeyinga til veiða á botnfiski þær sömu í ár og þær voru á síðasta ári, eða 5.600 tonn, en hámark fyrir þorskveiði er áfram 2.400 tonn og 650 tonn fyrir keilu innan þessa heildarmagns.

Ísland mun þá áfram hafa heimild til að veiða 1.300 tonn af makríl, sem eru aflaheimildir frá Færeyjum í færeyskri lögsögu, en Ísland afsalar sér heimildum til veiða á 2.000 tonnum af Hjaltlandssíld sem lengi hafði verið í samningi þjóðanna, án þess að Ísland hafi nýtt sér þær heimildir um árabil.

Þjóðirnar eru sagðar stefna að því að hefja vinnu við gerð rammasamnings milli landanna um fiskveiðimál sem fyrst með það að markmiði að þeirri vinnu verði lokið fyrir 1. september á þessu ári.

Samkomulag náðist ekki í desember

Mánuður er síðan Kristján Þór Júlíusson, sjávarútvegs- og landbúnaðarráðherra, ákvað að fella úr gildi allar heimildir færeyskra fiskiskipa til að stunda veiðar innan íslenskrar lögsögu á þessu ári.

Átti ákvörðunin rætur sínar að rekja til árlegs fundar sjávarútvegsráðherra Íslands og Færeyja, sem haldinn var í Þórshöfn 12.–13. desember, þar sem ekki tókust samningar.

Á fundinum bauð Ísland fram óbreyttan samning á sama tíma og Færeyjar kröfðust aukinna heimilda til veiða á botnfiski í íslenskri lögsögu ásamt afléttingu takmarkana á manneldisvinnslu á loðnu.

mbl.is
Afurð Dags. Meðalverð
Þorskur, óslægður 17.1.19 287,17 kr/kg
Þorskur, slægður 17.1.19 332,13 kr/kg
Ýsa, óslægð 17.1.19 271,19 kr/kg
Ýsa, slægð 17.1.19 236,90 kr/kg
Ufsi, óslægður 17.1.19 100,26 kr/kg
Ufsi, slægður 17.1.19 134,00 kr/kg
Djúpkarfi 16.1.19 253,00 kr/kg
Gullkarfi 17.1.19 306,60 kr/kg
Litli karfi 24.10.18 17,00 kr/kg
Blálanga, óslægð 17.1.19 190,00 kr/kg

Fleiri tegundir »

17.1.19 Þorleifur EA-088 Þorskfisknet
Þorskur 3.287 kg
Karfi / Gullkarfi 573 kg
Ufsi 305 kg
Ýsa 96 kg
Samtals 4.261 kg
17.1.19 Einar Guðnason ÍS-303 Lína
Þorskur 3.891 kg
Ýsa 2.639 kg
Steinbítur 251 kg
Langa 13 kg
Karfi / Gullkarfi 10 kg
Samtals 6.804 kg
17.1.19 Egill ÍS-077 Rækjuvarpa
Rækja (úthafsrækja) 3.714 kg
Samtals 3.714 kg
17.1.19 Sæli BA-333 Lína
Steinbítur 1.198 kg
Þorskur 125 kg
Ýsa 81 kg
Skarkoli 9 kg
Samtals 1.413 kg

Skoða allar landanir »