Norsk skip flýja veðrið til Fáskrúðsfjarðar

Tólf skip frá Noregi liggja nú við bryggju á Fáskrúðsfirði vegna veðurs úti fyrir austanverðu landinu. Þrjú þeirra hafa landað afla til manneldis í Loðnuvinnslunni á Fáskrúðsfirði, samkvæmt upplýsingum frá útgerðinni.

Þeirra á meðal er norska fjölveiðiskipið Østerbris, sem landaði 2.250 tonnum af kolmunna á Fáskrúðsfirði á þriðjudag, en það var fyrsti kolmunnaaflinn sem landað er á Íslandi á þessu ári.

Fram kemur á vef Loðnuvinnslunnar að fiskurinn hafi verið vænn og verið veiddur í landhelgi Skotlands, en Norðmenn eru með samning við Evrópusambandið um veiðar í skoskri lögsögu.

Østerbris er 2800 tonna skip, byggt í Tyrklandi árið 2014 og er sami mannskapur búinn að starfa lengi við skipið.

„Það hættir enginn, þetta er góð vinna sem gefur öruggar tekjur og góð frí á milli,” segir Trond Østervold skipstjóri í fróðlegu samtali á vef Loðnuvinnslunnar. Hann segir það alltaf gott að koma til Fáskrúðsfjarðar.

„Hér er tekið vel á móti okkur, öllum okkar þörfum og óskum er sinnt og við finnum vel að við erum velkomnir.”

• Blogga um frétt