ORA-rétturinn skaraði fram úr

Íslenski matvælaframleiðandinn ORA á bestu smásöluvöru ársins, en verðlaunin voru veitt í gær á sjávarútvegssýningunni í Boston í Bandaríkjunum.

Verðlaunin voru veitt fyrir „Creamy masago bites“, rétt sem samanstendur af þremur vörum; masago, sem unnið er úr íslenskum loðnuhrognum, laxamús úr íslenskum eldislaxi, og sesam-brauðkexi. Rétturinn er einn af fjórum forréttum sem ORA markaðssetur fyrir Ameríkumarkað og hluta af Evrópu undir vörumerkinu Iceland's finest.

„Réttirnir eru nánast tilbúnir í pakkningunum og krefjast sáraeinfaldrar eldamennsku og fárra mínútna,“ segir Jóhannes Egilsson, útflutningsstjóri ORA, í umfjöllun um þetta mál í Morgunblaðinu í dag, en fyrirkomulagið er ekkert ósvipað réttum frá t.d. Eldum rétt og Einn, tveir og elda. Verðið verður í kringum 20 Bandaríkjadollara á hverja pakkningu sem dugir fyrir fjóra.