Vilja íslenska sérfræðiþekkingu

Íslensk stjórnvöld og Alþjóðabankinn hafa undirritað sameiginlega viljayfirlýsingu um aukið samstarf á sviði sjálfbærrar nýtingar sjávarauðlinda og annarra málefna hafsins. Í yfirlýsingunni felst að Ísland styðji við verkefni bankans á þessu sviði, bæði með íslenskri sérfræðiþekkingu og með stuðningi við fiskimannasamfélög þar sem bankinn er þegar með verkefni, til dæmis í Vestur-Afríku.

Þetta kemur fram í tilkynningu frá utanríkisráðuneytinu, en Guðlaugur Þór Þórðarson utanríkisráðherra átti í gær fund með Lauru Tuck, varaforseta Alþjóðabankans á sviði sjálfbærrar þróunar. Tekið er fram að samskonar samstarf sé nú þegar í gildi á sviði jarðhitanýtingar.

Guðlaugur Þór Þórðarson og Laura Tuck við undirritun yfirlýsingarinnar.

Mikilvægur þáttur í að nýta íslenska sérþekkingu

Á fundinum greindi utanríkisráðherra frá áherslu Íslands á málefni hafsins í alþjóðlegri þróunarsamvinnu Íslands og mikilvægi samstarfs Íslands og Alþjóðabankans á því sviði, enda Alþjóðabankinn einn mikilvægasti fjármögnunaraðili sjálfbærrar þróunar.

Laura Tuck þakkaði Íslandi fyrir góða samvinnu á sviði sjálfbærrar auðlindanýtingar. Hún tók fram að stuðningur Íslands muni nýtast vel í verkefnum í aðildarríkjum bankans. Mikil þörf sé á sérfræðiaðstoð á þessu sviði.

„Þetta aukna samstarf við bankann er mikilvægur þáttur í að nýta íslenska sérþekkingu í þróunarverkefnum og koma henni á framfæri innan alþjóðastofnana, en á það var einmitt lögð áhersla í skýrslu stýrihóps um utanríkisþjónustu til framtíðar á síðasta ári,“ er haft eftir Guðlaugi Þór í tilkynningu ráðuneytisins.

Auglýst eftir ráðgjöfum

Í síðasta mánuði auglýsti utanríkisráðuneytið, í samvinnu við Ríkiskaup, eftir ráðgjöfum til að sinna verkefnum á sviði sjálfbærrar nýtingar sjávarauðlinda og verndunar hafsins í alþjóðlegu þróunarsamstarfi. Listi um ráðgjafa skapar grunn fyrir þá sérþekkingu sem hægt verður að leggja til verkefna á vegum Alþjóðabankans og annarra alþjóðastofnana á komandi árum. Opið er fyrir skráningar á listann til kl. 12.00 á morgun, 18. maí.

„Það er mjög ánægjulegt að auka samstarf við Alþjóðabankann, stærstu þróunarsamvinnustofnun heims, á sviði sjálbærrar nýtingar sjávarauðlinda. Þar höfum við Íslendingar mikilsverða sérþekkingu sem mikilvægt er að deila með fátækari þjóðum,“ segir Guðlaugur Þór sem einnig átti fund með Susanne Ulbæk, stjórnarfulltrúa kjördæmis Norðurlandanna og Eystrasaltsríkjanna í Alþjóðabankanum.

„Ísland mun taka yfir formennsku í samstarfi kjördæmisins á næsta ári og þar með leiða samræmingu í málefnavinnu þessa öfluga ríkjahóps innan Alþjóðabankans. Það verður krefjandi verkefni en jafnframt tækifæri til að sýna hvað í okkur býr og láta gott af sér leiða.“

• Blogga um frétt