„Góð veiði og veðrið með besta móti“

„Þetta var fínn túr, góð veiði og veðrið var með besta móti miðað við árstíma. Við vorum um þrjá og hálfan sólarhring á veiðum og aflinn var um 180 til 190 tonn, miðað við slægt,“ segir Friðleifur Einarsson, skipstjóri á Engey RE.

Fram kemur á vef HB Granda að skipið hafi komið til hafnar mun fyrr en áætlað var, vegna góðra aflabragða.

„Við hófum veiðar á Fjöllunum. Fengum þar gullkarfa og svo hittum við á ufsa og náðum að veiða það sem vinnslan hafði skammtað okkur,“ segir Friðleifur.

Aðallega þorskur og gullkarfi með

Næst reyndi áhöfnin fyrir sér á Eldeyjargrunni.

„Aflinn var aðallega þorskur og svo fengum við gullkarfa með. Við enduðum svo veiðar á Selvogsbankanum en þar var aflinn aðallega þorskur og ýsa.“

Friðleifur segir að töluvert magn virðist vera af fiski á suðvestursvæðinu.

„Það er hins vegar mikil hreyfing á þessum fiski og því ekki á vísan að róa. Það á ekki síst við um ufsann. Maður gengur aldrei að honum vísum. Stundum verður maður sama og ekkert var við ufsa á slóðinni en aðra daga hittir maður á ufsann og þá getur stundum verið mokveiði.“

• Blogga um frétt