Mætti kalla á laxinn í mat?

Sigmari Guðbjörnssyni, framkvæmdastjóra Stjörnu-Odda, þætti gaman að sjá hvort mætti yfirfæra niðurstöður rannsóknar á fóðrun þorska yfir á laxeldi og þannig hugsanlega stuðla að jafnari vexti fiska í sömu kví. „Það er ekki fyllilega ljóst hernig laxinn hegðar sér þegar fóðri er dreift út í kvína, og hvort t.d. fiskurinn sem syndir neðst átti sig á því þegar fóðrunin hefst, eða hvort goggunarröð kemst á í kvínni þar sem sterkari fiskarnir matast á undan þeim veikari,“ útskýrir hann.

Bæði væri hægt að nota skynjara til að sjá betur hegðun einstaklinga innan kvíar, en líka nota hljóðgjafa sem Stjörnu-Oddi smíðaði til að laða fiskinn upp að yfirborðinu þegar fóðri er dreift. „Við hönnuðum búnaðinn fyrir tilraun Björns Björnssonar hjá Hafrannsóknastofnun þar sem kom í ljós að hægt var að kenna þorski að þekkja tiltekið hljóð og koma að fóðurstöð, og gátu þorskar sem höfðu lært að þekkja hljóðið kennt öðrum þorskum á augabragði að synda að hljóðinu.“

Sigmar segir ekkert hægt að fullyrða um hvort eldislax muni hegða sér með sama hætti, en það væri þess virði að gera tilraunina. „Útkoman gæti verið bæði betri fóðurnýting og fiskur í jafnari stærð, og mætti nota t.d. stærðarmælana frá Vaka til að sjá það nokkuð fljótlega hvort áhrifin væru jákvæð.“

Ítarlegra viðtal við Sigmar má finna í ViðskiptaMogganum í dag.