Gefur út rekstrarleyfi til fiskeldis
Setja bókamerki
Matvælastofnun hefur veitt Arctic Sea Farm hf. rekstrarleyfi til fiskeldis í Patreksfirði og Tálknafirði í samræmi við lög um fiskeldi. Þetta kemur fram í tilkynningu frá Matvælastofnun en stofnunin auglýsti tillögu að rekstrarleyfi á vefsíðu stofnunarinnar 5. júlí og var frestur til að skila inn athugasemdum til 2. ágúst.
Matvælastofnun bárust athugasemdir frá tveimur aðilum vegna tillögunnar. Arctic Sea Farm sótti um rekstrarleyfi fyrir 6.800 tonnum af laxi í Patreks- og Tálknafirði en umsókn um rekstrarleyfi var móttekin 23. september 2016. Úttekt starfsstöðva hefur farið fram og hefur Matvælastofnun staðfest gildistöku rekstrarleyfis Arctic Sea Farm FE-1145 í Patreks- og Tálknafirði. Þar með fellur rekstrarleyfi til bráðabirgða úr gildi.
Fram kemur að hámarkslífmassi eldisins í Patreks- og Tálknafirði muni ekki fara yfir 7.800 tonn sem sé í samræmi við burðarþolsmat fjarðanna.
„Tekið var tillit til áhættumats Hafrannsóknarstofnunar við útgáfu rekstrarleyfisins. Starfsemin er einnig háð starfsleyfi Umhverfisstofnunar. Framkvæmd fyrirtækisins fór í gegnum mat á umhverfisáhrifum í samræmi við lög um mat á umhverfisáhrifum,“ segir enn fremur.
Þá kemur fram að heimilt sé að kæra ákvörðun Matvælastofnunar um útgáfu rekstrarleyfisins til úrskurðarnefndar umhverfis- og auðlindamála.
Handteknir eftir myndatöku í Vesturbæjarlaug
Nemendur í HÍ reistu tjaldbúðir án leyfis
Kostnaður meiri en milljón á fermetra
Sex hafa greinst með listeríu
Frambjóðendur skila inn listum í Hörpu
Skar höfuðleðrið af íslenskri konu