38% aukning útflutningsverðmæta úr eldi

Útflutningsverðmæti eldisafurða nam 1,4 milljörðum króna í september, að því er segir í tölum Hagstofunnar. „Þetta er nokkuð hægari aukning en verið hefur það sem af er ári en engu að síður veruleg, eða um 38% á milli ára og hefur útflutningsverðmæti eldisafurða aldrei áður verið meira í septembermánuði,“ segir í samantekt á vef Samtaka fyrirtækja í sjávarútvegi.

Þar segir einnig að gengi krónunnar hafi verið að jafnaði um 7% veikara í september en í sama mánuði í fyrra. „Er því um að ræða 28% aukningu í verðmætum í erlendri mynt.“

Er jafnframt bent á að á fyrstu 9 mánuðum ársins nema útflutningsverðmæti eldisafurða 16,8 milljörðum króna. Borið saman við útflutningsverðmæti eldisafurða í fyrra, 9,6 milljarða króna, er aukningin 75% milli ára. Aukningin er hins vegar 56% ef tekið er tillit til gengisáhrifa.

„Það er stóraukin framleiðsla á eldislaxi sem skýrir þessa aukningu og er útflutningsverðmæti lax 90% meira á fyrstu 9 mánuðum ársins miðað við sama tímabil í fyrra,“ segir á vef SFS.

• Blogga um frétt