Sáttur við aflann þrátt fyrir snarvitlaust veður

Ísfisktogarinn Akurey AK kom til Reykjavíkur í nótt og fer aftur á miðin síðdegis á morgun.

„Ég er nokkuð sáttur við aflabrögðin í þessum fyrsta túr ársins. Veðrið var reyndar lengst af snarvitlaust en það dúraði á milli og þá gátum við verið að veiðum,“ segir Magnús Kristjánsson sem var skipstjóri í þessari fyrstu veiðiferð ársins, að því er segir í tilkynningu frá Brimi.

„Við vorum á Vestfjarðamiðum í veiðiferðinni. Við fórum lengst austur í Þverál en þar var aflinn aðallega þorskur. Mér finnst þorskurinn þar vera frekar smár og við fórum úr Þverálnum á Halamið,“ bætir hann við.

„Því miður virðist þorskurinn ekki vera mættur af neinum krafti á miðin en við náðum þó að kroppa upp nokkuð af þorski og ufsa í bland. Við enduðum veiðar svo í Víkurálnum en þar var góð gullkarfaveiði og eins fengum við þorsk og ufsa,“ segir Magnús.

Hann nefnir að lítið hafi orðið vart við loðnu í túrnum, hvorki sem fæðu fisks eins og þorsks né ánetjaða í trollinu.

Heildaraflinn náði 135 tonnum þrátt fyrir leiðinlegt veður.

„Versta veðrið skall á okkur á heimleiðinni í gær. Það voru um 25 til 30 metrar á sekúndu að vestan þegar við komum inn á Faxaflóann og heimsiglingin reyndist frekar erfið,“ segir Magnús í tilkynningunni.

• Blogga um frétt