Sérfræðingar búast við áframhaldandi aukningu á framleiðslu lax í sjókvíum. Framleiðslan eykst væntanlega um 5-7 þúsund tonn í ár og fer yfir 30 þúsund tonna markið og gæti farið í 35-37 þúsund tonn á næsta ári.

Aukningin verður þó ekkert í líkingu við það sem varð á síðasta ári þegar framleiðsla á laxi tvöfaldaðist. Áætlanir þessar grundvallast á upplýsingum um aukingu í útsetningu laxaseiða í sjókvíar. Á síðasta sumri voru settar út um 9,3 milljónir seiða, tveimur milljónum seiða meira en árið áður, samkvæmt upplýsingum Matvælastofnunar. Raunar hefur seiðunum fjölgað taktvisst um tvær milljónir seiða á ári í þrjú ár.

Öll aukningin úr sjókvíum

Öll aukningin í fiskeldi á síðasta ári kom úr sjókvíum og mest úr fjörðum Vestfjarða og Austfjarða. Um þrír fjórðu laxaframleiðslunnar koma frá þessum tveimur eldissvæðum og frá fjórum stærstu fiskeldisfyrirtækjunum. Arnarlax sem er með höfuðstöðvar á Bíldudal er langstærsti framleiðandi laxaafurða. Framleiddi 11.700 tonn á síðasta ári sem er 23% aukning frá fyrra ári. Hin sjóeldisfyrirtækin eru yngri en öll í örum vexti og framleiddu 4 til 5 þúsund tonn í fyrra.

Framleiðsla á bleikju jókst meira á síðasta ári en áætlanir gerðu ráð fyrir, eða um 29%, að því er fram kemur í umfjöllun um mál þetta í Morgunblaðinu í dag. Búist er við áframhaldandi jafnri og stöðugri aukningu. Mjög hefur dregið úr eldi á regnbogasilungi hér við land en breyting á því er í aðsigi því að minnsta kosti tvö fyrirtæki eru að undirbúa eldi.

Tengdar fréttir

Fiskeldi

Akureyringar taka ekki afstöðu

• Lagareldisfrumvarpið ekki lagt fram
• Þróa aðferð til framleiðslu á geldlaxi
• Stórfellt laxeldi áformað
• Stýrir sölu- og markaðsmálum First Water

» Fleiri tengdar fréttir