Þorskur undir merkjum Báru vann Vitann

Sigurlið Vitans (áður Hnakkaþon), hugmyndakeppni sjávarútvegsins, sem fór fram um liðna helgi, leggur til að Brim leggi áherslu á sjálfbærni íslenskra fiskveiða í markaðssetningu á íslenskum þorski í Bandaríkjunum, að því er fram kemur í fréttatilkynningu frá Háskólanum í Reykjavík.

Í sigurtillögunum er lagt til að lögð verði áhersla á markaðssetningu til ungra og vel stæðra kvenna í Maine og Massachusetts, undir vörumerkinu Bára, enda sýni rannsóknir að konur taki ákvarðanir um kaup á neytendavörum í 85% tilfella. „Við erum svakalega ánægð með þetta og lögðum mikið á okkur,“ segir Anton Björn Sigmarsson, nemi í hátækniverkfræði og einn liðsmanna sigurliðsins, í samtali við 200 mílur.

Frétt af mbl.is

Gervigreind verði notuð til að selja fisk

Anton Björn útskýrir að áskorunin hafi falist í að markaðssetja fisk Brims í Bandaríkjunum. „Tillaga okkar var að finna markhóp sem Brim gæti nýtt sér sem byrjunarpunkt í frekari markaðskönnunum á bandaríska markaðnum, sem einkennist af mikilli samkeppni og tiltölulega lítilli hágæðafiskmenningu. Frumrannsóknir okkar bentu til þess að besti markhópurinn væri konur undir fertugu, í sambandi, með áhuga á sjálfbærni og auðveldum hollum uppskriftum. [Einnig] kom fram að konur hafa 85% neytendavalds á bandarískum markaði og eru líklegri til þess að fjárfesta í sjálfbærari vörum og þarf okkar vara því að höfða til þeirra. Við bjuggum til vörumerki og pakkningu sem við töldum höfða til þessa markhóps.“

Einnig lagði liðið til notkun tölvusjónar og gervigreindar til þess að auka sjálfbærni hjá íslenskum útgerðum. Með tækninni er hægt að vita nákvæmlega fjölda fiska í trolli hverju sinni og sjá til þess að orkunotkun sé hagkvæm miðað við magn fisks í trollinu.

Dómnefndina skipuðu Ari K. Jónsson, rektor HR, Heiðrún Lind Marteinsdóttir, framkvæmdastjóri SFS, Ægir Páll Friðbertsson, framkvæmdastjóri Brims, Magnús Þorlákur Lúðvíksson, forstöðumaður viðskiptaþróunar Icelandair, og Valdimar Sigurðsson, prófessor við viðskiptadeild HR.