Bar ekki árangur að koma við í Sláturhúsinu

Vestmannaey VE landaði fullfermi af ýsu, þorski og karfa í Vestmannaeyjum í gær og í dag landaði síðan Bergey VE um 60 tonnum af blönduðum afla, að því er fram kemur á vef Síldarvinnslunnar.

„Þetta var sannkallaður skraptúr hjá okkur en við vorum að reyna við tegundir sem eftir er að veiða á kvótaárinu. Þetta þarf gjarnan að gera þegar sér fyrir endann á kvótaárinu,“ er haft eftir Ragnari Waage Pálmasyni, skipstjóra á Bergey.

„Við byrjuðum á Pétursey í leit að sólkola en þar var lítið að hafa. Þá var farið á Ingólfshöfðann og þar fékkst ýsa. Síðan var haldið á Gula teppið sunnan við Tangaflakið og þar var verið í skrapi. Í lokin komum við svo við í Sláturhúsinu í von um að fá skarkola en árangurinn varð lítill. Í restina voru tekin þrjú hol við Ingólfshöfðann og þar fékkst blandaður afli; þorskur, koli og steinbítur. Það gengur á ýmsu í skraptúrum sem þessum,“ segir hann.

• Blogga um frétt