Flotinn með 6% minni heildarafla í júlí

Heildarafli íslenskra fiskiskipa nam rétt tæplega 90 þúsund tonnum í júlí 2020 sem er 6% minni afli en í júlí 2019 þegar heildarafli flotans var 95 þúsund tonn, að því er fram kemur á vef Hagstofu Íslands. Þá var aflaverðmæti í júlí, metið á föstu verðlagi, 14% minna en í júlí í fyrra.

Fram kemur að botnfiskaflinn hafi í júlí verið rétt rúmlega 31 þúsund tonn en var rúmlega 38 þúsund tonn í sama mánuði í fyrra og nemur því samdrátturinn 18%. Samdrátturinn var 6% í þorski, 18% í ýsu, 42% í ufsa og 32% í karfa.

Uppsjávarafli var tæplega 56 þúsund tonn sem er 4% meiri afli en í júlí 2019. Makríll er þar stærsta tegundin og var aflinn 40 þúsund tonn, sem er 5% minna en á sama mánuði í fyrra. Ámóti kemur að 88% meiri síld fékkst í júlí og nam aflinn tæplega fimmtán þúsund tonnum.

Tólf mánaða afli 8% minni

Flatfiskafli var um 2.200 tonn sem er 17% aukning miðað við fyrra ár en mikill samdráttur var í skel- og krabbadýraafla í júlí sem var rétt tæp 400 kíló en 1.533 kílóum var landað í júlí 2019.

Ef litið er til 12 mánaða tímabils, frá ágúst 2019 til júlí 2020, var heildaraflinn tæplega 994 þúsund tonn sem er 8% minni afli en á sama tímabili ári fyrr.

• Blogga um frétt