Heildarafli 9% meiri í september

Afli íslenskra fiskiskipa nam rúmlega 119 þúsund tonnum í september og er það 9% meiri afli en í sama mánuði í fyrra. Hins vegar var verðmæti aflans 3,4% minna í mánuðinum í ár en árið 2019, að því er fram kemur á vef Hagstofu Íslands.

Í september var botnfiskaflinn rúmlega 35 þúsund tonn sem er um 1% minna en í sama mánuði 2019. Samdráttur í þorskafla var um 900 tonn en hann nam ríflega 20 þúsund tonnum. Ýsuaflinn jókst talsvert og nam hann 5.759 tonnum sem er 33% meira en í sama mánuði í fyrra. Þá varð 25% samdráttur í ufsa og 1% samdráttur í karfa.

Betra er með uppsjávaraflann en hann var um 80 þúsund tonn í september þessa árs ámóti 69 þúsund tonnum í september 2019, nemur því aukningin 17%. Megnið af aflanum var síld, eða tæplega 62 þúsund tonn, og jókst síldaraflinn um 23%. Makrílaflinn dróst saman um 3% og nam ríflega 17 þúsund tonnum.

Fram kemur í tölum stofnunarinnar að heildarafli flotans á tólf mánaða tímabili, október 2019 til september 2020, hafi verið 1.021 þúsund tonn sem er 6% minna en á sama tímabili á undan.

Frétt af mbl.is

Þrjá tíma af miðunum að bryggju

• Blogga um frétt