„Það hefur verið hörkugangur í þessu“

Vel gengur á kolmunnaveiðum suður af Færeyjum og hafa skipin Bjarni Ólafsson AK, Beitir NK og Börkur NK verið á miðunum að undanförnu. Nú er Bjarni Ólafsson er á landleið með fullfermi og er stutt í að Beitir og Börkur ná að fylla.

„Við erum með fullfermi eða 1810 tonn en veiðin hófst 5. janúar sl. Aflinn fékkst í sjö holum en það er mjög lengi dregið eða frá 18 tímum og upp í 32. Stærsta holið okkar var 505 tonn en það minnsta 130,“ er haft eftir Runólfi Runólfssyni, skipstjóra á Bjarna Ólafssyni, á vef Síldarvinnslunnar.

Runólfur Runólfsson skipstjóri Ljósmynd/Síldarvinnslan/Smári Geirsson

„Veiðin fer fram í færeysku lögsögunni alveg við skosku línuna. Það hefur verið töluverður straumur en veiðin hefur engu að síður gengið þokkalega. Það er spurning hve lengi er unnt að veiða þarna því fiskurinn er að ganga suðureftir og hann spáir ekki vel. Það fer brátt að bræla og síðan verður vart veiðiveður fyrr en um miðja næstu viku,“ segir Runólfur.

Nýtt troll svínvirkar

Þá kveðst Tómas Kárason, skipstjóri á Beiti, ánægður með gang veiða. „Við erum komnir með tæp 3000 tonn og erum væntanlega á okkar síðasta holi. Það hefur verið hörkugangur í þessu,“ segir hann.

Tóm­as Kára­son, skip­stjóri Beit­is NK. Ljósmynd/Þorgeir Baldursson

„Við erum með nýtt troll frá Hampiðjunni og það virðist svínvirka. Aflinn hjá okkur hefur gjarnan verið töluvert meiri en hjá öðrum þrátt fyrir að við höfum dregið í styttri tíma. Við höfum verið að draga frá 6 tímum og upp í 24 og fengum til dæmis mjög gott hol eftir 12 tíma. Við erum nú á okkar ellefta holi og síðan verður lagt af stað í land síðar í dag eða í kvöld með fullfermi,“ útskýrir Tómas.

• Blogga um frétt