Leiðindaveður á leiðinni á kolmunnamiðin

Skipafloti Síldarvinnslunnar hélt til kolmunnaveiða frá Neskaupstað í gær. Fyrst Beitir NK sem fór um morguninn, svo Bjarni Ólafsson AK í hádeginu, Börkur NK síðdegis og síðast Polar Amaroq. Fram kemur á vef fyrirtækisins að gert sé ráð fyrir að kolmunninn gangi norður úr skosku lögsögunni og inn á hið svonefnda gráa svæði á þessum árstíma, en þar geta skipin hafið veiðar.

„Hér eru 25-30 metrar og heldur leiðinlegt veður og það verður bræla áfram samkvæmt spá, alveg fram á annað kvöld. Það er engin veiði hafin á gráa svæðinu,“ er haft eftir Hjörvari Hjálmarssyni, skipstjóra á Berki. „Oft hefur veiðin byrjað þar upp úr 10. apríl og stundum reyndar fyrr eða 4.-5. apríl. Í fyrra hófst veiðin hins vegar seint. Mig minnir að það hafi verið 16. apríl. Þetta er svolítið breytilegt á milli ára en þetta kemur,“ segir hann.

• Blogga um frétt