Segir lestarkerfið ganga hnökralaust í brælutúr

Slippurinn á Akureyri lauk í síðasta mánuði við uppsetningu á nýju lestarkerfi í Björgu EA 7, ferskfisktogara í eigu Samherja. Kerfið byggir á því að tómum kerjum er lyft á sjálfvirkan hátt úr magasíni í lest og upp á vinnsluþilfar þar sem kerunin fer fram, að því er fram kemur á vef Slippsins á Akureyri.

Full ker af vinnsluþilfari eru síðan send með lyftu niður í lest, þar sem kerastæðum er safnað saman í magasíni sem rúmar allt að 35 ker. Lestarkerfið byggir að mestu á lestarkerfinu sem Slippurinn hannaði og smíðaði í Kaldbak EA 1.

„Lestarkerfið bætir alla vinnuaðstöðu fyrir hásetana en það bæði auðveldar okkur vinnuna og eykur öryggi til muna. Það er mikill kostur að kerfið er einfalt og skilvirkt. Við fórum með kerfið nýtt út í brælutúr og það gekk hnökralaust,“ segir Kjartan Vilbergsson, yfirvélstjóri á Björgu.

Auk þess að setja upp lestarkerfið annaðist Slippurinn almennt viðhald á Björgu og var sett upp krapakerfi og minni háttar breytingar gerðar fremst á vinnsluþilfari til að aðlaga vinnslubúnaðinn nýja lestarkerfinu og kerunaraðstöðunni. Þá var skipið tekið upp í flotkví, það málað og aðalvélin tekin upp.

• Blogga um frétt