Níu milljarða króna snekkja á hringferð í kringum landið

Lystisnekkjan Satori hefur verið á hringferð í kringum landið að undanförnu. Hún var á Siglufirði um helgina en var komin til Akureyrar á mánudag. Hún hafði áður átt viðkomu m.a. í Reykjavík, Grundarfirði og á Ísafirði.

Snekkjan er í eigu bandarísks auðkýfings, Jay Alix, smíðuð árið 2018 og kostaði um 75 milljónir dollara, jafnvirði um 9 milljarða króna.

Fleyið er reyndar skráð á Cayman-eyjum, 64 metrar að lengd og 12 metra breitt. Snekkjan lá við bryggju á Siglufirði en t.d. í Grundarfirði lá hún fyrir akkerum úti fyrir höfninni.

Á vef Grundarfjarðarhafnar kom fram að um borð væru fimm farþegar og 15 manna áhöfn. Hjá höfninni á Siglufirði fengust þær upplýsingar að í sumar væri von á 15 smærri skemmtiferðaskipum en áttu upphaflega að vera alls um 40.