Hrognavinnsla hafin
Setja bókamerki
Vinnsla loðnuhrogna hófst hjá Brimi hf. á Akranesi í gærmorgun, en vinna átti hrognin úr farmi sem Venus NK fékk á Breiðafirði um helgina. Reikna má með að er líður á vikuna færist kraftur í hrognafrystingu en hrognin fara að mestu á markað í Japan og eru verðmætasta afurð loðnunnar. Auk Akraness verða hrogn fryst í fiskiðjuverum í Vestmannaeyjum, Hornafirði, Fáskrúðsfirði, Eskifirði, Neskaupstað, Vopnafirði og Þórshöfn.
Að sögn Ingimundar Ingimundarsonar, útgerðarstjóra uppsjávarskipa hjá Brimi, er þroski hrognanna í minnsta lagi fyrir frystingu fyrir Japan, en hann eykst dag frá degi. Hópur undir stjórn Arnars Eysteinssonar, bónda í Stórholti 2 í Saurbæ í Dalabyggð, var í gær mættur til starfa í hrognavinnslunni á Akranesi. Agnar hefur í rúmlega 20 ár tekið þátt í hrognavertíð á Skaganum og frá 2007 haldið utan um hópinn sem sér um að skera, skilja, hreinsa, þurrka og frysta hrognin. Í hópnum er fólk úr Dölunum, frá Akranesi og víðar.
Aðalmálið að gera sem mest úr því sem tekst að veiða
Í gær voru tvö skip Brims að veiðum utarlega á Breiðafirði, nokkur skip voru á miðjum Faxaflóa og allmörg skip voru á leið á miðin. Á sunnudag fengu þrjú skip afla í grennd við Hornafjörð.
Ingimundur segir að veðrið hafi spilað stóra rullu á vertíðinni og útlit sé fyrir að svo verði áfram. Þrátt fyrir tíðina hafi fengist ágætur afli þegar gefið hafi. Spurður hvort hann sé áhyggjufullur um að kvótinn náist ekki segir hann að ekki þýði að hugsa þannig: „Aðalmálið er að gera sem mest úr því sem okkur tekst að veiða og nýta á sem verðmætastan hátt,“ segir Ingimundur.
Samkvæmt yfirliti á vef Fiskistofu er búið að landa 409 þúsund tonnum á vertíðinni og eftir að veiða 253 þúsund tonn miðað við kvóta upp á 662 þúsund tonn. Sú tala á eftir að hækka eitthvað þegar endanlega liggur fyrir hversu mikið Norðmenn náðu ekki að veiða á vertíðinni.
Teygir sig suður fyrir Hagafell og gæti stækkað
„Langur aðdragandi að þessu eldgosi“
Fá hjálp við að takast á við lífið eftir fangelsi
Gossprungan um 2,5 km löng
Rautt hættumat í Svartsengi
Rennur í átt að stofnlögnum: Rafmagn tekið af
Mengunin berst í austur
Rekstur flugvallarins með „hefðbundnum hætti“