„Það hefur ekkert breyst nema nafnið“

Ísfiskitogarinn Bergur, sem áður gekk undir nafninu Bergey VE, hélt í sína fyrstu veiðiferð undir nýju nafni síðdegis síðastliðinn föstudag. Kom togarinn til löndunar með fullfermi síðastliðinn mánudag. 

Skipstjóri á Bergi í þessarri veiðiferð var Ragnar Waage Pálmason. 

Frétt af mbl.is

Tímamót þegar Bergey verður Bergur

Í fréttatilkynningu frá Síldarvinnslunni er haft eftir Ragnari:

„Við vorum þrjá daga í túrnum og það var víða farið. Við byrjuðum á að taka tvö hol á Pétursey og þar var töluvert af þorski. Síðan voru tekin tvö hol á Mýragrunni og þar var helst ýsa. Síðan var farið í Lónsbugtina í leit að ufsa og þar á eftir tekið eitt hol í Sláturhúsinu. Síðasta holið var síðan tekið við Ingólfshöfðann. Aflinn sem komið var með að landi var blandaður en mest af þorski, ýsu og ufsa. Ég held að megi segja að þessi veiðiferð hafi bara gengið þokkalega.“

Leggja áherslu á karfa

Þá segir í tilkynningunni að hann kunni ágætlega við nýja nafn skipsins.

„Þetta er sama skipið og við vorum á áður, það hefur ekkert breyst nema nafnið.“

Bergur hélt til veiða strax að löndun lokinni á mánudaginn og var ætlunin að leggja áherslu á að veiða karfa.

Vestmannaey VE landaði einnig fullfermi í Vestmannaeyjum á mánudaginn.

• Blogga um frétt