Búið að koma vélarvana bát í land

Fiskibát sem varð vélarvana nálægt landi hjá Bjarnarnesi í Húnaflóa hefur verið komið til hafnar og eru mennirnir tveir sem voru um borð komnir í land. Þetta staðfestir Landhelgisgæslan í samtali við mbl.is.

Frétt af mbl.is

Vélarvana með tvo um borð

Kom annar fiskibátur á svæðinu vélarvana bátnum til bjargar og dró hann að landi. Þyrla Landhelgisgæslunnar var skammt frá vegna æfinga og kom stýrimaður þyrlunnar bátunum tveim til aðstoðar.

Seig stýrimaðurinn niður og um borð í fiskibátinn sem var kominn til að aðstoða hinn og hjálpaði hann við að koma taug í bátinn sem var vélarvana. Þyrlan lenti á Bjarnarnesi á meðan og beið eftir því að bátarnir tveir kæmu í land.

Björgunarsveitir á svæðinu voru einnig ræstar út og fóru björgunarmenn á slöngubát til að vera innan handar ef eitthvað skyldi fara úrskeiðis. 

• Blogga um frétt