Björgunaræfing var haldin um borð í Ljósafelli upp úr hádegi í gær er skipið lagði frá bryggju á Fáskrúðsfirði. Á meðan æfingu stóð skaut áhöfnin upp neyðarblysum, en lögreglu og slökkviliði hafði verið gert viðvart um æfinguna, að því er fram kemur á vef Loðnuvinnslunnar, sem gerir skipið út.

Þar segir að forvarnir og fræðsla um borð í skipum fari „að stórum hluta fram í gegnum nýliðafræðslu sem skipstjórnendur sinna og einnig á reglulegum björgunaræfingum en það er hluti skylduverkefna áhafna. Kröfur um tíðni æfinga á fiskiskipum 15 metra eða lengri er einu sinni í mánuði samkvæmt reglugerð um öryggi fiskiskipa. Tilgangurinn með þeim er að undirbúa áhöfnina hvernig bregðast eigi við ef neyðarástand skapast.“

Blysin sáust vel frá landi. Ljósmynd/Loðnuvinnslan: Arnfríður Eide

Björgunaræfingar voru framkvæmdar ellefu sinnum á skipinu á síðasta ári. Ljósmynd/Loðnuvinnslan: Þorgeir Baldursson

Alls voru framkvæmdar 11 æfingar á Ljósafelli á síðasta ári og á það sama á við Hoffellið, sem Loðnuvinnslan gerir einnig út. Eru skipin því sögð uppfylla þær kröfur sem gerðar eru.

Fínasta veiði hefur verið hjá Ljósafelli að undanförnu og hefur skipið landað tvisvar frá því að fiskveiðiárið hófst 1. september síðastliðinn, bæði skiptin á Fáskrúðsfirði. Alls hefur skipið landað um 195 tonnum, þar af 105 tonn af þorski, 40 tonn af ufsa, 27 tonn af ýsu og 17 tonn af karfa.

Tengdar fréttir

Öryggi sjófarenda

Dýrt að reka eina vél

• Áhyggjur meðal sjómanna af Gæslunni
• Stutt við kaup á nýju björgunarskipi
• Færa smábátasjómönnum öryggisapp að kostnaðarlausu
• Strand skemmtiferðaskips kallar á erlenda aðstoð

» Fleiri tengdar fréttir

• Blogga um frétt