Markaðsverð á eldislaxi hefur hækkað fimmtu vikuna í röð og hefur því enn eitt metið verið sett, en samkvæmt vísitölu Nasdaq náði meðalverð á laxi í sláturstærð (3-6 kíló) í síðustu viku 115,17 norskum krónum á kíló eða 1.621 íslenskri krónu.

Um er að ræða 4,79% verðhækkun milli vikna en í síðustu viku var meðalverð 33,34% hærra en fjórum vikum á undan og 62,66% hærra en tólf vikum á undan.

Fyrir ári fjölluðu 200 mílur um að meðalverð á laxi í sláturstærð hafi verið 60,54 norskar krónur. Frá þeim tíma hefur verð hækkað um 54,63 norskar krónur eða 90,3%.

Frétt af mbl.is

Markaðsverð á laxi lækkar um 10% á einni viku

Háð töluverðri óvissu

Hæsta meðalverð í síðustu viku fékkst fyrir lax á bilinu sjö til átta kíló og nam það 120,9 norskar krónur á kíló eða 1.701 íslenska krónu en lægsta var 79,23 norskar krónur fyrir lax sem er eitt til tvö kíló.

Ef litið er til meðalverðs í síðustu viku óháð stærðarflokki nam það 111,85 norskum krónum, jafnvirði 1.573 íslenskra króna, sem er 2,93% hækkun frá vikuna á undan. Þá var meðalverð óháð stærðarflokki í síðustu viku 30,88% hærra en fjórum vikum á undan og 56,56% hærra en tólf vikum á undan.

Því hefur verið spáð að verð fari lækkandi eftir páskahátíðina og því er gert ráð fyrir að meðalverð í þessari viku verði nokkuð lægra. Sú spá er þó háð töluverðri óvissu þar sem verð matvæla hafi almennt hækkað og því ekki endilega víst að árleg lækkun verði jafn ör og áður.

Frétt af mbl.is

Fimm kílóa lax á 8.000 krónur