Róttæki klerkurinn Omar Bakri Mohammed, sem átt hefur yfir höfði sér ákæru fyrir landráð í Bretlandi, hefur yfirgefið landið. Mun hann hafa haldið til Miðausturlanda. Bakri, sem er fæddur á Sýrlandi, hlaut harða gagnrýni þegar hann neitaði að fordæma hryðjuverkin í Lundúnum 7. júlí síðastliðinn og tilraunir til hryðjuverka hálfum mánuði síðar.
Bakri er andlegur leiðtogi öfgasamtakanna al Muhajiroun, sem búist er við að verði bönnuð með vísun í ný hryðjuverkalög í Bretlandi. Bakri hafði mælst til þess að múslimar tilkynntu lögreglu ekki um hugsanlega hryðjuverkaógn í Bretlandi.
Þá sagði hann það skyldu trúbræðra sinna í Bretlandi, að berjast gegn breskum her í Írak og Afganistan.
„Ég ætla að snúa aftur eftir fjórar vikur… vegna þess að fjölskylda mín er í Bretlandi,“ sagði Bakri í samtali við bresku útvarpsstöðina Radio Live Five, en hann var þá staddur í Líbanon, að eigin sögn til að heimsækja móður sína.
Anjem Choudary, samstarfsmaður Bakris, sagði í samtali við bresku fréttastofuna Sky, að hann hefði farið að sinna skyldustörfum sínum í Líbanon og færi hugsanlega eftir það til einhverra landa í arabísku furstadæmunum.