Þrjár manneskjur hafa verið skotnar til bana í Kenía eftir að mótmæli brutust út á nýjan leik vegna úrslita forsetakosninganna í landinu.
Níu ára barn er á meðal þeirra sem voru skotnir til bana á meðan á mótmælunum stóð.
Uhuru Kenyatta náði endurkjöri sem forseti og í ræðu sinni hvatti hann til þess að andstæðingar sínir efndu ekki til ofbeldisfullra mótmæla.
Mótmælendur áttu í átökum við lögregluna í fátækrahverfum höfuðborgarinnar Nairobi í nótt.
Raila Odinga, leiðtogi stjórnarandstöðunnar sem bauð sig fram gegn Kenyatta, hefur haldið því fram að átt hafi verið við niðurstöður kosninganna.