Danski uppfinningamaðurinn Peter Madsen er ákærður fyrir að hafa misþyrmt og bundið sænsku blaðakonuna Kim Wall áður en hann myrti hana. Þetta kemur fram í ákæruskjölum sem danska dagblaðið Berlingske Tidende hefur undir höndum.
Madsen er ákærður fyrir að hafa orðið Wall að bana í ágúst á síðasta ári á meðan þau voru í ferð á kafbáti sem hann smíðaði.
Greint var frá því í síðustu viku að danska lögreglan sé sannfærð um að Madsen hafi skipulagt morðið á Wall og að hann hafi undirbúið sig fyrir það. Berlingske segir að í ákæruskjölunum komi fram í hverju sá undirbúningur hafi falist, en Madsen hafi m.a. tekið með sér um borð í kafbátinn Nautilus þann dag sög, hníf, oddmjótt skrúfjárn, teygjur og rörbúta.
Þá er Madsen ákærður fyrir að hafa misþyrmt Wall áður en hann myrti hana. Dánarorsök liggur fyrir, en saksóknari segir hana þó mögulega hafa verið skorna á háls eða kyrkta.
Madsen hafi að því loknu sundurlimað lík hennar og að lokum bundið rörbúta við líkamshlutana til að þyngja þá niður og tryggja að þeir héldust á hafsbotninum.
Sjálfur hefur Madsen sagt að Wall hafi látist af slysförum í kafbátnum. Áður hélt Madsen því fram að hann vissi ekki um Wall þar sem hann hefði sett hana í land.
Madsen hefur síðan einnig viðurkennt að hafa varpað líki Wall í hafið, en líkamshlutar hennar hafa síðan fundist í sjónum og er talið að Madsen hafi hlutað lík hennar í sundur.
Réttarhöldin í málinu hefjast 8. mars og er búist við niðurstöðu 25. apríl.