7,2 stiga jarðskjálfti mældist í Oaxaca-fylki í suðurhluta Mexíkós skömmu fyrir miðnætti að íslenskum tíma. Skjálftinn fannst vel í Mexíkóborg þar sem byggingar svignuðu en ekki er vitað um slys á fólki að svo stöddu. Upptök skjálftans eru í grennd við bæinn Pinotepa de Don Luis.
Jarðskjálftastofnunum ber ekki saman um stærð skjálftans en Jarðskjálftastofnun Mexíkó segir skjálftann hafa verið 7 af stærð en Bandaríska jarðfræðistofnunin sagði skjálftann upphaflega hafa verið 7,5 af stærð en staðfestar mælingar sýna að skjálftinn hafi verið 7,2 af stærð.
Ekki hefur verið gefin út flóðbylgjuviðvörun í kjölfar skjálftans.
Tveir stórir jarðskjálftar riðu yfir Mexíkó í september í fyrra, sá fyrr þann 7. september og mældist hann 8,2 stig og varð 96 manns að bana. 19. september mældist 7,1 stiga jarðskjálfti sem varð 369 manns að bana. Skjálftinn í kvöld er á svipuðum slóðum og skjálftarnir í fyrra.