Fimm menn komu í dag fyrir rétt í Bretlandi vegna sýruárásar á þriggja ára dreng. Einn hinna ákærðu er faðir drengsins.
Ráðist var á drenginn í versluninni Home Bargains í Worcester síðdegis á laugardag. Hann var í kjölfarið fluttur á sjúkrahús með alvarleg brunasár á andliti og hendi.
Fram kom í réttinum í dag að drengurinn og móðir hans væru komin í öruggt skjól, en ekki er enn vitað hver langtímaáhrif árásarinnar munu verða.
Faðir drengsins, sem ekki var nefndur á nafn af lagalegum ástæðum, kom fyrir dómara ásamt þremur Slóvökum og einum Breta.
Allir neituðu þeir sök.
Mennirnir voru úrskurðaðir í gæsluvarðhald og munu koma fyrir dómara á ný í lok ágúst.