Hópur aðgerðasinna í Hong Kong á yfir höfði sér fangelsisdóm eftir að hafa verið dæmdur sekur fyrir ólögleg mótmæli og aðild að skipulögðum fjöldamótmælum í borginni mánuðum saman árið 2014.
Á meðal þeirra sem voru í fylkingarbrjósti í fjöldamótmælunum eru námsmaður, prófessorar, baptistaprestur og fésýslumaður.
Niðurstaða réttarhaldanna þykir ýta styrkari stoðum undir áhyggjur fólks um að kínversk yfirvöld séu að herða tökin í fjármálaborginni og að þau vilji hafa enn meira að segja um rekstur hennar.
Níu aðgerðasinnar voru dæmdir í dag fyrir aðild í mótmælum árið 2014 sem kennd hafa verið við regnhlífar. Þar fóru mótmælendur fram á frjálsar kosningar um næsta leiðtoga borgarinnar.
Flestir þeirra sem tóku þátt í mótmælunum voru námsmenn og fólk sem kennir sig við Occupy-hreyfinguna sem hófst í Bandaríkjunum.
Þúsundir mótmælenda sváfu á götunum í viðskiptahverfinu og þóttu þeir sérlega agaðir og hæverskir í framkomu. Þeir hreinsuðu meðal annars allt rusl á götunum til að koma í veg fyrir að það safnaðist upp og gáfu sér tíma til að flokka það.
Einu verjur mótmælendanna voru regnhlífar sem þeir notuðu til að verjast rigningu, geislum sólarinnar og piparúða sem lögregla borgarinnar beitti. Mótmælin hafa því verið kölluð „regnhlífabyltingin“.
Á meðal þeirra sem voru í fylkingarbrjósti í mótmælunum er Benny Tai, lagaprófessor og einn stofnenda Occupy-hreyfingarinnar í Hong Kong. Á meðal annarra sem stofnuðu Occupy-hreyfinguna í Hong Kong er Chan Kin-man, fyrrverandi félagsfræðiprófessor.
Aldraður baptistaprestur, Chu Yiu-ming, hafði beitt sér fyrir lýðræðisumbótum í um það bil áratug þegar hann tók þátt í stofnun Occupy-hreyfingarinnar. Hann stjórnaði leynilegum aðgerðum til að hjálpa kínverskum andófsmönnum að komast hjá handtöku og saksókn. Hann skaut yfir þá öruggu skjólshúsi í Hong Kong og hjálpaði þeim að sækja um hæli erlendis.
Baptistapresturinn hóf baráttuna eftir fjöldamorðin í Peking árið 1989 þegar mótmælin á torginu við Hlið hins himneska friðar voru kveðin niður. „Ég gat ekki tára bundist,“ sagði hann í viðtali fyrir nokkrum árum. „Ég fór með bæn: Guð, hvað getum við gert?“
Á meðal annarra í Occupy-hreyfingunni er stjórnandi vogunarsjóðs, Edward Chin, sem er á meðal fésýslumanna sem hafa tekið þátt í baráttunni fyrir lýðræði.
Chan Kin-man, Benny Tai og Chu Yiu-ming eru meðal þeirra sem voru dæmdir sekir í dag og eiga þeir allir yfir höfði sér fangelsisdóm. Er talað um að þeir verði jafnvel dæmdir í allt að sjö ára fangelsi fyrir brot sitt.