Til stendur að banna sérstaka túristavagna í París. Um er að ræða strætisvagna sem gjarnan eru á tveimur hæðum og keyra um borgina með ferðamenn, en Reykvíkingar ættu að vera slíkum vögnum kunnugir.
Emmanuel Gergoire, aðstoðarborgarstjóri Parísar, segir í samtali við dagblaðið Le Parisien að ætlunin sé að fá ferðamenn til að ganga, hjóla eða nýta sér hefðbundnar almenningssamgöngur. Ferðamannavagnarnir séu fyrirferðarmiklir á götum borgarinnar og jaðri við að algjört stjórnleysi ríki í kringum helstu áfangastaði vagnanna, túristaperlur a borð við Eiffel-turninn.
Borgarstjórn bíður þess að nýtt frumvarp um samgöngur verði samþykkt í franska þinginu en það gefur sveitarstjórnum auknar valdheimildir til að takmarka bílaumferð og stjórna umferð nýrra fararskjóta svo sem leiguhjóla og rafhlaupahjóla sem hafa sprottið upp eins og gorkúlur í mörgum stórborgum á undanförnum misserum.
Umferð rúta var bönnuð í miðborg Reykjavíkur sumarið 2017, en þeim er þó áfram heimilt að keyra stærri götur líkt og Lækjargötu.
„Ferðamenn geta gert eins og aðrir, og skipt yfir í umhverfisvænni ferðamáta eða tekið almenningssamgöngur,“ bætir Gregoire við. „Við þurfum breytingar!“ Leggur hann til að leiðsögumenn aðlagist breytingunum með því að bjóða upp á hjólaferðir eða gönguferðir.
Þrátt fyrir óeirðir gulvestunga sem settu svip sinn á borgina síðastliðið haust, var met sett í París og sóttu 50 milljónir ferðamanna höfuðborgarsvæði Frakka heim í fyrra, samanborið við 48 milljónir árið áður.