Atvinnumálaráðherra Bandaríkjanna, Alexander Acosta, hefur nú tilkynnt um afsögn sína. Ýmsir stjórnmálamenn og réttindasamtök í Bandaríkjunum kröfðust afsagnar hans, eftir að í ljós kom að Acosta hafði sem saksóknari gert samkomulag við milljarðamæringinn Jeffrey Epstein árið 2008, en hinn síðarnefndi hafði verið ákærður fyrir barnaníð.
Acosta átti þátt í því að alríkisyfirvöld gerðu samkomulag við Epstein árið 2008, þegar hann var fyrst sakaður um mannsal og kynferðisbrot gegn stúlkum undir lögaldri. Epstein hefur nú verið ákærður í New York-ríki fyrir að eiga samræði við stúlkur undir lögaldri, mansal og skipulagningu mannsals.
Acosta hafði verið saksóknari fyrir alríkisyfirvöld í Flórída-ríki í rúman áratug þegar hann bauð Epstein samkomulagið árið 2008. Í því fólst að Epstein gengist við tveimur minniháttar brotum sem ekki færu fyrir alríkidómstól heldur dómstól innan Flórída-ríkis. Hann fékk 18 mánaða fangelsisdóm og fékk til að mynda að starfa á skrifstofu sinni sex daga vikunnar. Þá var fórnarlömbum hans ekki tilkynnt um samkomulagið.
Acosta hefur varið sinn þátt í rannsókninni árið 2008 sem leiddi til samkomulagsins. Sagði hann samkomulagið hafa verið einu leiðina til að tryggja að Epstein sæti inni og myndi þurfa að skrá sig sem kynferðisbrotamann.