Íranski herinn, byltingarverðirnir svonefndu, tóku annað breskt olíuskip til viðbótar við Hormuz-sund í dag. Um klukkustund áður hafði herinn tekið skipið Stena Impero. Þetta kemur fram á miðlinum Fox News.
Skipin sigla í átt til hafnar í Íran en þau voru á leið til Sádi-Arabíu. Ekki hefur náðst samband við þá 23 sem eru í áhöfn skipsins. Talsmaður fyrirtækisins Stena Impero, sagði að þyrla og óþekkt skip hefðu nálgast skipið þegar það var á siglingu á alþjóðlegu svæði.
„Við höfum ekki fengið neina vitneskju um slys á áhöfninni. Öryggi þeirra er það sem við hugsum fyrst og fremst um,“ segir í tilkynningu frá eiganda Stena Impero.
Samkvæmt tilkynningu frá íranska hernum var skipið tekið á þeim forsendum að „það hafi ekki farið eftir alþjóðlegri siglingarlöggjöf og reglugerðum.“ Skipinu yrði siglt að ónefndri höfn í Íran. Samkvæmt ratsjá eru skipin á leið til hafnar í Qeshm-eyjar í Íran.
Samkvæmt frétt BBC er breska utanríkiráðuneytið að vinna í því að kynna sér málavexti og þá hefur Cobra-nefndin, neyðarnefnd breskra stjórnvalda, verið kölluð saman til fundar.
Bresk stjórnvöld kyrrsettu íranskt olíuskip við Gíbraltar 4. júlí og hafa Íranir í kjölfarið reynt að svara í sömu mynt og krafist þess að skipið, Grace 1, verði leyft að halda þaðan.