Heilbrigðistarfsmenn víða um heim vara við því að ungt fólk sé að verða of kærulaust þegar kemur að kórónuveirufaraldrinum.
Yfirvöld í fjölmörgum löndum hafa hægt og rólega verið að aflétta sóttvarnatakmörkunum og í kjölfarið hafa skemmti- og veitingastaðir sumstaðar troðfyllst af unglingum og ungu fólki. Þar sem samkomustaðir eru enn lokaðir hefur ungt fólk víða brugðið á það ráð að halda einkasamkvæmi eða koma saman á óskipulögðum viðburðum á ströndum, í almenningsgörðum og víðar.
Í bresku borginni Manchester söfnuðust þúsundir saman í rave-partý þar sem áfengi var um hönd og fjölmargir virtu reglur um grímuskyldu og fjarlægðartakmarkanir að vettugi. Samskonar viðburðir hafa farið fram víðar í Evrópu, meðal annars í almenningsgörðum í Parísarborg í Frakklandi, og tilraunir lögreglu til að koma í veg fyrir slíkar samkomur virðast þýðingarlitlar.
Afleiðingar þessa er gríðarleg fjölgun smita meðal ungs fólks í mörgum löndum og undanfarið hefur Alþjóðaheilbrigðismálastofnunin ítrekað reynt að biðla til ungs fólks um að virða reglur.
Ekki ólíkt því sem uppi er hér á landi, er meirihluti nýrra smita í Kanada meðal ungs fólks. Í Sviss eru um 40-50% nýrra smita síðasta hálfa mánuðinn á meðal ungs fólks og fjölmargar borgir í Frakklandi hafa séð mikla aukningu smita meðal ungra.
Yfirvöld í Sviss og víðar hafa brugðist við með því að gera skemmtistöðum og börum að loka dyrum sínum að nýju. Þá hafa yfirvöld í Madrid á Spáni brugðist við með nýrri auglýsingu sem á að ná til ungs fólks. Í auglýsingunni má sjá hóp fólks drekka bjór á bar og dansa síðan á skemmtistað áður en auglýsingin skiptir yfir á sjúkling í öndunarvél á sjúkrahúsi og loks líkbrennsluhús.