Kamala Harris, varaforseti Bandaríkjanna, mun á föstudag leggja leið sína að landamærum Bandaríkjanna og Mexíkó, í fyrsta skipti síðan þau Joe Biden voru kjörin til að leiða Bandaríkin.
Eftir opinbera heimsókn til Mexíkó þar sem Harris ráðlagði fólki frá því að leita yfir landamærin, var hún spurð hvers vegna hún væri ekki búin að fara í heimsókn að landamærunum og taka stöðuna þar. Vék hún sér ítrekað undan því að veita nokkur svör.
Hart hefur verið gengið að Harris að fara að landamærunum og kynna sér aðstæður þar af eigin raun, eftir að forsetinn fól henni það verkefni að takast á við „frumorsakir“ fólksflutninganna miklu frá Suður-Ameríku.
Fleiri streyma að landamærum Mexíkó og Bandaríkjanna nú en þekkst hefur síðustu 20 ár, eftir talsverðan samdrátt í valdatíð Donalds Trumps. Tilkynnt var um fyrirhugaða ferð Harris að landamærunum viku eftir að Trump lýsti því yfir að hann ætlaði þangað 30. júní.