Það verða engar brotalamir í löggæslu á landsbyggðinni á meðan leiðtogafundi Evrópuráðsins stendur í Hörpu síðar í mánuðinum. Þetta segir Karl Steinar Valsson, yfirlögregluþjónn alþjóðasviðs ríkislögreglustjóra.
Um 40 þjóðarleiðtogar hafa boðað komu sína í Hörpu þar sem fundurinn verður haldinn dagana 16. og 17. maí.
Ljóst er að mikill þungi verður lagður í að manna stífa öryggisgæslu í Reykjavík þá dagana. Til viðbótar við þann liðsauka sem lögreglan á höfuðborgarsvæðinu fær frá Norðurlöndunum hefur fjöldi lögregluþjóna úr umdæmum af landsbyggðinni verið kallaður til.
Aðspurður hvort lögreglan óttist að einhverjir muni reyna að nýta sér glufur í löggæslu á þessum dögum, segir Karl Steinar að slíkt væri „einkar óviturleg ákvörðun“.
„Við erum alveg að tryggja það, að það eigi engin brotalöm að vera í löggæslunni á þessum tíma. Það er bara aukið álag á lögreglumenn og starfsmenn lögreglunnar á þessum tíma.“
Verður hægt að tryggja að þeir fái þá hvíld eftir fundinn?
„Það verður bara að koma í ljós.“