Katrín Jakobsdóttir forsætisráðherra segir von á því á allra næstu dögum hvort hún láti verða af forsetaframboði, líkt og margir hafa talið líklegt.

„Ég fór ekki að hugsa þetta alvöru fyrr en um páskahátíðina,“ segir Katrín í samtali við mbl.is.

„Ég hef bæði heyrt í fólki og tekið mér tíma til þess að velta þessu fyrir mér, svona sjálf. Ég er á lokametrunum í þeirri ígrundun og mun gefa svör um það hvort ég læt vaða, á allra næstu dögum.“

Hún vildi ekki tilgreina nánar hvenær þeirrar niðurstöðu væri að vænta, en líklegt má telja að það gerist um eða fyrir þessa helgi. Þing kemur saman á ný í næstu viku og ganga þarf frá þessum og ýmsum endum öðrum fyrir það.

Vg vill halda áfram ríkisstjórnarsamstarfi

„Ég geri mér grein fyrir því að staða mín, í ljósi þess að ég gegni embætti forsætisráðherra, er snúin. Ég hef því upplýst félaga mína, Bjarna [Benediktsson] og Sigurð [Inga Jóhannsson], um að ég sé að velta þessu fyrir mér. Og geri mér líka grein fyrir því að sú umhugsun má ekki taka of langan tíma.“

Þingflokkur Vinstri grænna hittist fyrir ríkisstjórnarfund í dag, en að sögn voru mögulegt forsetaframboð Katrínar og ríkisstjórnarsamstarfið þar helst til umræðu.

Heimildir mbl.is innan úr Vinstrihreyfingunni – grænu framboði herma að þar á bæ telji menn réttast að núverandi ríkisstjórnarsamstarf haldi áfram ákveði Katrín að hverfa á braut. 

Tengdar fréttir

Forsetakosningar 2024

Baldur dansaði á súpuhittingi á Snæfellsnesi

• Kjörseðlar kláruðust: Aðsókn meiri en áætlað var
• Akureyringur: „Hann væri sístur hjá mér“
• Katrín efst í nýrri könnun Prósents
• Ný könnun kynnt á forsetafundi á Akureyri

» Fleiri tengdar fréttir

• Blogga um frétt