Mætir nýjum verkefnum með óttaleysi

Halla Tómasdóttir er forstjóri The B Team.
Halla Tómasdóttir er forstjóri The B Team. mbl.is/Eggert Jóhannesson

Halla Tómasdóttir, forstjóri The B Team, segir að vináttan, fjölskylda og jákvætt viðhorf skipti mestu máli í lífinu. Hún segir að þegar verkefni lífsins mæta grípi möguleikarnir hana. B Team eru alþjóðleg samtök leiðtoga sem beita sér saman fyrir bættum viðskipta- og stjórnarháttum í þágu umhverfis og samfélags. Það var góðgerðarstofnun Rockefeller sem kom að stofnun B Team fyrir 6 árum síðan. Sú stofnun hefur stutt mörg helstu framfaraverkefni heimsins sl. 60 árin. Hún er nýkomin frá Bellagio þar sem hún tók þátt í 60 ára afmælisráðstefnu Rockefeller-stofnunarinnar. Það sem hún tekur frá þeirri ráðstefnu er sú skoðun að nú sé komin tíminn á endursköpun um víða veröld.

-Hvað skiptir mestu máli í lífinu?

„Fjölskyldan, vináttan, heilsan og jákvætt viðhorf til alls þess sem lífið hefur upp á að bjóða.“

-Hvaða breytingar hefur þú gert á undanförnum árum sem hafa haft hvað mestu áhrifin á lífið þitt?

„Ég hef alltaf verið opin fyrir ævintýrum en með hverju árinu sem líður tekst mér sífellt betur að mæta þeim verkefnum sem koma í óttaleysi. Því fylgir bæði vellíðan og hamingja.“

-Hvaða ráð myndir þú gefa tvítugri sjálfri þér?

„Að hafa hugrekki til að hlusta ávallt á mína innri rödd og leyfa henni að hljóma og ráða för í lífinu.“

-Ef þú mættir breyta einhverju einu í heiminum- hvað væri það?

„Að fleiri konur væru í forystu, alls staðar.“

-Hvað er góð sjálfsvirðing að þínu mati?

„Hæfileg blanda af sátt við eigin sál og líkama og auðmýkt gagnvart því að við erum hvert og eitt bara lítill hluti af stórkostlegri heild.“

-Þegar verkefni lífsins mæta, hvað grípur þig þá?

„Möguleikarnir. Við getum skapað þá framtíð sem við viljum, fyrir okkur sjálf, okkar afkomendur og heiminn allan.“

-Hvernig er að vaxa og þroskast á persónulega sviðinu?

„Það er verkefni, og jafnframt tilgangur lífsins.“

-Hvað skiptir mestu máli að kynlóðin sem þú tilheyrir geri til að tryggja framtíð komandi kynslóða?

„Við verðum að hugsa um móður jörð, við eigum ekkert annað heimili. En við eigum líka að hugsa betur hvert um annað, skapa manneskjulegt samfélag þar sem allir fá notið sín. Fegurðin og framtíðin felst í fjölbreytileika náttúru, lífríkis og samfélags.“

-Er eitthvað sem við gerum sem við ættum að endurhugsa?

„Við eigum að endurhugsa skilgreiningu árangurs. Fyrirtæki eiga ekki bara að mæla fjárhagslegan hagnað, heldur einnig áhrif sín á umhverfi og samfélag. Samfélög eiga ekki bara að mæla hagvöxt, heldur einnig vellíðan og samfélagslegar framfarir. Sem einstaklingar þurfum við að hugsa meira um vöxt og vellíðan og hversu vel við lifum og störfum í sátt við okkar eigin gildi.“

-Hvað þýðir gott uppeldi að þínu mati?

„Líklega er fátt mikilvægara en að ganga á undan með góðu fordæmi og reyna að hjálpa börnum sínum að þroska eigin dómgreind og gildismat. En svo skipta einfaldir hlutir líka máli, borða sem oftast saman kvöldmat og ræða málin.“

-Áttu eitt gott ráð sem þú vilt gefa áfram sem þú getur deilt með lesendum?

„Láttu gott af þér leiða, heimurinn þarf á öllum okkar einstöku kröftum að halda, aldrei meir en nú. Ég trúi því staðfastlega að það búi leiðtogi inní hverju okkar og að verkefni lífsins sé að leysa hann úr læðingi og nýta til góðs.“

-Hvernig kanntu við þig sem forstjóri B TEAM?

„Starfið er óneitanlega krefjandi en einnig gríðarlega spennandi og skemmtilegt. Ég fæ að starfa með einstökum hópi leiðtoga, sem eiga það sameiginlegt að vilja beina kröftum sínum að því að bæta heiminn. Við erum að storka viðteknum venjum í viðskiptum og erum ekki sammála skilgreiningu hagfræðingsins Milton Friedman sem sagði fyrir nær 50 árum síðan að eina hlutverk fyrirtækja væri að hámarka arð til sinna hluthafa. Jafnvel ef svo væri, þá gæti ekkert fyrirtæki gert það til lengri tíma litið nema að sinna sínu starfsfólki, samfélagi og umhverfi vel. Þessi þrönga sýn á hlutverk fyrirtækja hefur skilið eftir sig rjúkandi rúst í umhverfismálum, útbrennt starfsfólk og lágt traust og ósátt í samfélaginu. Við viljum sjá forystufólk fyrirtækja stjórnvöld og samfélag vinna saman að úrlausnum á þessum stóru áskorunum.“

Þú varst að koma frá Bellagio þar sem þú tókst þátt í 60 ára afmælisráðstefnu Rockefeller-stofnunarinnar, segðu okkur aðeins frá því

„Góðgerðarstofnun Rockefeller kom að stofnun B Team fyrir 6 árum síðan. Rockefeller hefur stutt mörg helstu framfaraverkefni heimsins sl. 60 ár og boðaði nú sína samstarfsfélaga til ráðstefnu um heimsmarkmiðin. Þarna komu saman þjóðarleiðtogar, listafólk, aktívistar, fulltrúar næstu kynslóða og fjölbreytt forystufólk til að ræða leiðir til úrlausna á heimsmarkmiðunum. Árið 2015 samþykktu yfir 190 þjóðríki þessi markmið og sögðust jafnframt ætla sér að ná þeim fyrir árið 2030. Við erum langt frá því ef fram heldur sem horfir og vorum við að vinna að hugmyndum um hvernig við gætum skipulagt áratug efnda og fengið stjórnvöld, einkageirann og almenning í sameiginlegt átak þar um. Ég lærði mikið og á köflum var þetta krefjandi, enda er erfitt að horfast í augu við hvað áskoranirnar eru margar og flóknar. En ég fylltist líka innblástri því það er margt gott fólk að vinna hreint ótrúlegt starf um allan heim. Mér líður samt stundum eins og heimurinn sé „óheilbrigður líkami” og við erum allt of oft að ræða afleiðingar þess, í stað þess að horfa á líkamann í heild sinni og viðurkenna að þau kerfi sem við höfum skapað eru ekki að þjóna heilsu okkar lengur. Það er kominn tími á endurskoðun…eða öllu heldur endursköpun.“

mbl.is