Mikil umræða spratt upp á dögunum um svokölluð „kúltúrbörn“ en sagt er að kúltúrbörn hafi vegna ættartengsla aðgang að menningarauðmagni sem lýsi sér í völdum og áhrifum umfram aðra.
Sitt sýnist hverjum um réttmæti þessarar umræðu en ljóst er að „kúltúrbörnin“ eru fjölmörg og frábær og þeim ber að fagna. Smartland tók saman heitistu kúltúrbörn þjóðarinnar um þessar mundir.
Sigurbjartur Sturla Atlason er sonur Atla Rafns Sigurðarsonar leikara. Sturla Atlas hefur getið sér gott orð í rappheiminum og í heimi leiklistarinnar. Hann vakti til dæmis mikla athygli sem Rómeó í sýningu Þjóðleikhússins á Rómeó og Júlíu og var tilnefndur til Grímunnar.
Snæfríður Ingvarsdóttir er dóttir leikarahjónanna Ingvars E. Sigurðssonar og Eddu Arnljótsdóttur. Hún var aðeins 11 ára þegar hún lék í kvikmyndinni Kaldaljós. Árið 2016 útskrifaðist hún úr Leiklistarskóla Íslands og hefur að undanförnu starfað í Þjóðleikhúsinu. Þá hefur hún líka leikið í sjónvarpsseríunni Ófærð 3.
Hera Hilmarsdóttir er ein af þjóðargersemum Íslands um þessar mundir. Hún er dóttir Hilmars Oddssonar leikstjóra og Þóreyjar Sigþórsdóttur leikkonu. Hera hefur haslað sér völl sem leikkona erlendis og sýnt stórleik í hverju stykkinu á eftir öðru nú síðast í kvikmyndinni Svar við bréfi Helgu.
Baltasar Breki Samper á ekki langt að sækja leiklistarhæfileikana enda sonur Baltasars Kormáks, leikara og leikstjóra. Hann hóf ungur að aðstoða föður sinn í kvikmyndageiranum og hefur eftir útskrift úr leiklistarskólanum leikið í sjónvarpsþáttum á borð við Ófærð og Kötlu.
Þórður Ingi Jónsson listamaður sem þekktur er undir listamannsheitinu Lord Pusswhip er sonur Steinunnar Þórarinsdóttur listakonu og Jóns Ársæls Þórðarsonar fjölmiðlamanns. Hann hefur vakið mikla athygli í gegnum tíðina, aðallega á sviði tónlistar.
Þorri Hringsson myndlistarmaður er sonur Hrings Jóhannessonar listmálara. Þorri er þekktur fyrir mögnuð olíumálverk af íslensku landslagi. Þá er hann einnig virtur víngagnrýnandi.
Steiney Skúladóttir er dóttir leikaranna Halldóru Geirharðsdóttur og Skúla Gautasonar. Steiney kom eins og elding inn í íslenskt listalíf og heillaði alla upp úr skónum með líflegri framkomu og gleði. Hún er í hljómsveitinni Reykjavíkurdætrum og á vonandi eftir að láta ljós sitt skína áfram.
Systurnar slógu eftirminnilega í gegn þegar þær kepptu í Eurovision fyrir hönd Íslands á síðasta ári. Þær eiga ekki langt að sækja hæfileikana en þær eru dætur Ellenar Kristjáns og Eyþórs Gunnarssonar tónlistarfólks.
Listamaðurinn Ragnar Kjartansson hefur svo gott sem sigrað heiminn í listinni. Hann er einn af okkar fremstu listamönnum fyrr og síðar. Hann kemur úr mikilli listafjölskyldu en foreldrar hans eru leikararnir Kjartan Ragnarsson og Guðrún Ásmundsdóttir.
Gunnar Theodór Eggertsson er sonur rithöfundanna Þórunnar Jörlu Valdimarsdóttur og Eggerts Þórs Bernharðssonar. Sjálfur er Gunnar afkastamikill rithöfundur sem getið hefur sér gott orð fyrir ævintýralegar bækur. Hann hefur hlotið barnabókaverðlaun og verið tilnefndur til Íslensku bókmenntaverðlaunanna.
Systurnar Kamilla og Júlía Einarsdætur hafa vakið athygli fyrir ritverk sín. Þær eiga ekki langt að sækja hæfileikana en faðir þeirra er einn ástsælasti rithöfundur þjóðarinnar, Einar Kárason. Kamilla sló fyrst í gegn með Kópavogskrónikunni sem rataði svo á svið í Þjóðleikhúsinu undir leikstjórn Silju Hauksdóttur. Svo var hún tilnefnd til íslensku bókmenntaverðlaunanna fyrir skáldsöguna Tilfinningar eru fyrir aumingja. Það verður spennandi að sjá næsta útspil systranna.
Haraldur Ari Stefánsson er sonur Stefáns Jónssonar leikara og leikstjóra og Agnesar Amalíu Kristjónsdóttur fjölmiðlakonu og söngkonu. Haraldur lærði leiklistina í Bretlandi og hefur unnið við Borgarleikhúsið að undanförnu. Þá hefur hann vakið athygli í sjónvarpsþáttunum Kötlu.