Togað aftan í hnakkann á honum

„Mér fannst spilamennska minna manna góð í kvöld,“ sagði Ásmundur Arnarsson, þjálfari Fjölnis, í samtali við mbl.is eftir 1:3-tap fyrir Breiðabliki á útivelli í Pepsi Max-deild karla í fótbolta í kvöld. „Við vorum að horfa á skemmtilegan leik með mörgum færum en munurinn liggur í því að annað liðið nýtti færin sín en hitt liðið ekki. Við lákum fullódýrum mörkum líka,“ bætti Ásmundur við. 

Frétt af mbl.is

Þrjú víti og Breiðablik með fullt hús

Þrátt fyrir tapið var hann sáttur við margt í leik sinna manna. „Við byrjum leikinn af krafti og fáum góð færi, skjótum í slá og komumst einir í gegn. Í seinni hálfleik fáum við víti sem við klikkum á. Við eigum mikið af færum sem vanalega telja en það er dýrt að nýta þau ekki í svona leik. Strákarnir eiga hrós skilið fyrir þá vinnu sem þeir lögðu í leikinn, gott skipulag og leikurinn var góður.“

Frétt af mbl.is

Það var mjög notaleg tilfinning

Egill Arnar Sigurþórsson, dómari leiksins, hafði í nógu að snúast en hann dæmdi þrjú víti og gaf níu gul spjöld í leiknum. Ásmundur var ekki hrifinn af dómgæslunni í kvöld. 

„Mér fannst halla á okkur framan af í litlum atriðum. Þeir fengu að sópa okkur niður á vellinum og fóru mikið aftan í okkur. Það var tekið á því seint og þá urðum við pirraðir og fengum á okkur ódýr spjöld og menn voru klaufar.

Ég held það hafi getað orðið fleiri víti í þessum leik líka. Það er togað aftan í hnakkann á honum og farið með olnbogann í bakið á honum. Það fannst mér mesta vítið í þessum leik. Við þurfum að eiga við þetta þar sem við erum litla liðið í öllum leikjum. Við vitum að svona er þetta og við þurfum að berjast út úr því,“ sagði Ásmundur.

• Blogga um frétt