Stjarnan fer þess á leit að áfram verði spilað

Knattspyrnudeild Stjörnunnar hefur sent beiðni til KSÍ þar sem þess er farið á leit að áfram verði spilað í úrvalsdeildum án áhorfenda. 

Þetta herma heimildir mbl.is. 

Á upplýsingafundi almannavarna í dag kom fram að yfirvöld hefðu biðlað til íþróttahreyfingarinnar að fresta öllum íþróttamótum og keppnum fullorðinna í tíu daga, til 10. ágúst. 

KSÍ gaf einnig út fyrir stuttu að leikið yrði í kvöld samkvæmt leikskrá en að öllum leikjum yrði svo frestað til 5. ágúst. Þá ætlar sambandið að taka stöðuna á ný.

Frétt af mbl.is

Öllum leikjum frestað til 5. ágúst

Samkvæmt heimildum lýsti Stjarnan yfir áhyggjum sínum af framhaldi úrvalsdeilda færi svo að ekki yrði spilað næstu 10 daga, en karlalið stjörnunnar hefur þegar misst af leikjum í Pepsi Max deildinni eftir að liðið þurfti allt að fara í sóttkví í kjölfar þess að leikmaður liðsins smitaðist. 

Stjarnan telur að verði hlé gert á mótinu muni það ekki klárast fyrir veturinn, en leikjaplan gerir ráð fyrir því að spilað verði í Pepsi Max deild karla fram út október. 

• Blogga um frétt