Reynslunni ríkari fyrir komandi verkefni

„Mér fannst við gera þetta ágætlega, við byrjuðum leikinn af krafti og héldum skipulaginu vel,“ sagði Róbert Orri Þorkelsson, leikmaður íslenska U21 árs landsliðsins í knattspyrnu, á blaðamannafundi á samfélagsmiðlinum Teams eftir 2:0-tap gegn Frakklandi í lokaleik liðsins í lokakeppni EM 2021 í Györ í Ungverjalandi í dag.

Frétt af mbl.is

Skrefinu á eftir í lokaleiknum

„Við fáum á okkur mark snemma en mér fannst við samt gera vel í að halda áfram allan tímann. Við gáfum Frökkum góðan leik en auðvitað hefði ég viljað gera betur í mörkunum sem við fáum á okkur.

Ég þarf að sjá þau aftur og ég veit ekki hvort það var ég sem gerði hann réttstæðan þarna í fyrra markinu. Það er það eina sem ég er ósáttur með en heilt yfir fannst mér þetta ganga vel hjá okkur í dag,“ sagði Róbert.

Íslenska liðið tapaði öllum þremur leikjum sínum á mótinu og endaði með markatöluna 1:8.

„Við höfðum fulla trúa á okkur sjálfum farandi inn í lokakeppnina. Við ætluðum okkur sigur í þessum leikjum þótt það hafi ekki gengið eftir.

Það er mikilvægt að við lærum af því sem fór úrskeiðis og við erum reynslunni ríkari fyrir komandi verkefni,“ bætti Róbert við.

• Blogga um frétt