Nú þarf að klára mótið með sæmd

Matthías Vilhjálmsson, fyrirliði FH, var að vonum ánægður með 5:0-sigur á Leikni úr Reykjavík í 17. umferð úrvalsdeildar karla í knattspyrnu í kvöld. FH hafði mistekist að vinna í síðustu tveimur leikjum sínum og átti á hættu á að sogast ofan í fallbaráttuna.

„Þetta var rosalega jákvætt fyrir okkur, Leiknismenn hafa sýnt það í sumar að þeir eru með gott lið,“ sagði Matthías í samtali við mbl.is en hann skoraði annað mark FH-inga í kvöld og lék fínan leik eins og margir samherjar hans.

Frétt af mbl.is

FH skoraði fimm gegn Leikni

„Fyrri hálfleikur var jafn en um leið og við náðum inn öðru markinu þá gengum við á lagið, loksins. Þetta var frábært fyrir Fimleikafélagið í dag,“ bætti hann við en Matthías telur FH-liðið eiga að geta gert betur en taflan gefur til kynna. Liðið er í 6. sæti með 22 stig.

„Ég held að það sé engin spurning að þetta er voðalega mikið andlegt. Okkur finnst mikið búa í þessu liði en við höfum einfaldlega ekki sýnt það nógu oft í sumar. Þetta var lykilleikur fyrir okkur og spurningin var: ætlum við að dragast ofan í fallbaráttuna eða klára þetta mót með sæmd?

Við skuldum stuðningsmönnum og okkur sjálfum það, að spila betur. Við eigum góða leiki inni á milli en nú þarf að klára mótið með sæmd og byggja til framtíðar.“

Matthías var að skora sitt fimmta deildarmark í sumar og í öðrum deildarleiknum í röð. „Ég ætti að vera búinn að skora meira, klárlega, en ég veit að þú sem sérfræðingur veist að ég hef verið að spila á miðjunni seinustu níu leiki í röð. En ef ég á að vera með markapressu á mér þar, þá er það allt í lagi, ég tek það á kassann.“

• Blogga um frétt