Valur er með sex stiga forskot á toppi Bestu deildar kvenna í knattspyrnu eftir jafntefli gegn Breiðabliki í 15. umferð deildarinnar á Origo-vellinum á Hlíðarenda í kvöld.
Leiknum lauk með 1:1-jafntefli en bæði mörk leiksins komu í fyrri hálfleik.
Leikurinn fór fjörlega af stað og Natasha Anasi átti skalla í slá eftir hornspyrnu Taylor Ziemer strax á 8. mínútu.
Cyera Hintzen fékk mjög gott færi fjórum mínútum síðar þegar Sólveig Jóhannesdóttir Larsen átti frábæran sprett upp hægri kantinn en varnarmenn Blika hentu sér fyrir skot Cyeru og björguðu á síðustu stundu.
Á 32. mínútu dró til tíðinda þegar Anna Petryk átti frábæra fyrirgjöf frá hægri. Boltinn fór yfir miðverði Vals og Karitas Tómasdóttir var mætt á fjærstöngina. Hún átti þrumuskot sem fór í stöngina og inn og Blikar komnir yfir.
Það tók Valskonur ekki langan tím að jafna metin og á 41. mínútu átti Elísa Viðarsdóttir frábæra sendingu inn fyrir á Cyeru sem tók laglega á móti boltanum áður en hún átti frábært skot sem fór yfir Evu Nichole Persson í marki Blika og í netið.
Valskonur byrjuðu seinni hálfleikinn af krafti og strax á 47. mínútu átti Cyera frábært skot, utarlega í teignum, sem fór í stöngina og út.
Anna Rakel Pétursdóttir átti fast skot á 57. mínútu, af 30 metra færi, sem Persson í marki Blika gerði vel í að verja í horn. Upp úr hornspyrnunni átti Mist Edvarsdóttir svo skalla sem Persson varði aftur mjög vel.
Agla María Albertsdóttir átti laglegt skot á 67. mínútu af 35 metra færi en boltinn fór rétt yfir markið.
Bergþóra Sól Ásmundsdóttir átti fínt skot af 30 metra færi eftir hornspyrnu á 79. mínútu en boltinn fór rétt framhjá markinu.
Mariana Speckmaier fékk frábært færi til þess að tryggja Val sigurinn á 88. mínútu þegar boltinn barst til hennar á fjærstönginni en skot hennar fór beint á Persson í marki Blika sem var vel staðsett í markinu.
Í uppbótartíma fékk Birta Georgsdóttir svo besta færi Breiðabliks þegar hún var ein fyrir opnu marki eftir frábæra fyrirgjöf Vigdísar Lilju Kristjánsdóttir en Birta skaut framhjá markinu.
Valskonur eru áfram í efsta sæti deildarinnar með 36 stig og hafa sex stiga forskot á Breiðablik sem er í öðru sætinu með 30 stig.