Jamie Carragher, sparkspekingur á Sky Sports, hefur verið settur af í starfi sínu út þetta tímabil hjá sjónvarpsstöðinni.
Carragher hrækti inn um bílrúðu og lenti slumman í andliti 14 ára gamallar stúlku eftir leik Manchester United og Liverpool í ensku úrvalsdeildinni. Atvikið náðist á myndband sem fór í dreifingu um allt netið og samfélagsmiðla.
Í kjölfarið var Carragher kallaður á fund hjá yfirmönnum Sky Sports og var tímabundið settur í leyfi en nú hefur verið ákveðið að hann mun ekki starfa fyrir Sky meira á þessu tímabili en Carragher hefur verið álitsgjafi hjá sjónvarpsstöðinni og hefur ásamt Gary Neville verið með vinsælan sjónvarpsþátt í kringum leiki í enska fótboltanum á mánudagskvöldum.